NPL “Përparimi” ndërpret mbledhjen e mbeturinave për borxhlinjtë në disa fshatra të Vushtrrisë
—
Ndërmarrja Publike Lokale “Përparimi” në Vushtrri ka njoftuar se sot është ndërprerë shërbimi i mbledhjes së mbeturinave për ekonomitë familjare në fshatrat Gllovotin, Bivolak, Stroc, Zhilivod, Bëqiq, Dubovc dhe Galicë, sipas orarit të rregullt të mbledhjes. Sipas njoftimit, ndërprerja e shërbimit do të vazhdojë gjatë gjithë javës në të gjitha fshatrat, përfshirë edhe qytetin, për të gjithë konsumatorët që nuk i janë përgjigjur thirrjes për shlyerjen e borxheve të akumuluara.
Nga NPL “Përparimi” bëhet e ditur se ky veprim vjen pasi një numër ekonomish familjare nuk kanë reaguar ndaj ftesës së Kryeshefit Ekzekutiv, e dërguar ditë më parë, për kryerjen e pagesave të prapambetura. Ndërmarrja ka paralajmëruar se afati i fundit për shlyerjen e borxheve është 8 ditë nga sot, ndërsa në rast të mosrespektimit do të ndërmerren masa ligjore, përfshirë aplikimin e kamatës sipas legjislacionit në fuqi.
NPL “Përparimi” u bën thirrje të gjithë qytetarëve me obligime të papaguara që t’i shlyejnë ato me kohë, në mënyrë që të shmangen pasojat ligjore dhe të sigurohet vazhdimësia e shërbimit të mbledhjes së mbeturinave.