Një rast i rëndë i dhunës në familje është zbuluar në Vushtrri, ku një grua ka denoncuar burrin e saj pas 16 vitesh abuzim të vazhdueshëm, raporton Gazeta Sinjali.
Burime të Sinjalit bëjnë me dije se më 16 prill 2025, përmes aplikacionit “Info Kosova”, ankuesja S.G. (rreth 61-vjeçare) ka njoftuar Policinë se ishte kanosur për jetë nga bashkëshorti i saj, R.B. (rreth 68-vjeçar).
Për shkak të frikës, gruaja është detyruar të largohet nga Kosova dhe aktualisht ndodhet tek motra e saj jashtë vendit (vend i njohur për redaksinë e Sinjalit).
Në deklaratën e dhënë me shkrim, S.G. ka rrëfyer se për gjatë gjithë kohës së martesës kishte qenë viktimë e dhunës psikike dhe herë pas here edhe dhunës fizike, si pasojë e xhelozisë së burrit të saj.
Pas raportimit të rastit, Policia ka arrestuar të dyshuarin R.B., i cili është intervistuar në prezencë të avokatit mbrojtës.
Në konsultim me Prokurorinë, ndaj tij është iniciuar rasti për “Dhunë në familje”.
Sinjali – aty ku e vërteta flet para lajmit!
/GazetaSinjali/