Kandidati për deputet i Lëvizjes Vetëvendosje!, Sylejman Meholli, së bashku me ministrin e Punëve të Brendshme, Xhelal Sfeqla, zhvilluan një takim të veçantë në Vushtrri me disa prej veprimtarëve më të shquar të çështjes kombëtare të rajonit.
Takimi u organizua me iniciativën e Shkelzen Hadrit, nipit të historianit dhe veprimtarit të madh kombëtar, Prof. Ali Hadari. Të pranishëm ishin invalidë dhe veteranë të luftës, të përndjekur politikë, ish-të burgosur dhe përfaqësues të familjeve më emblematike të komunës, si dhe figura me kontribut të jashtëzakonshëm kombëtar.
Në një postim në rrjetet sociale, Meholli e quajti këtë ngjarje një nder të madh dhe theksoi rëndësinë e mbështetjes së këtyre personaliteteve në rrugëtimin politik drejt fitores së 9 shkurtit.
“Të gjithë të pranishmit, njëzëri, u zotuan për mbështetje të pakursyer, nga cepi në cep, për fitoren e madhe të 9 shkurtit,” u shpreh Meholli.
Ky takim simbolik thekson bashkëpunimin dhe unitetin mes figurave të shquara kombëtare dhe Lëvizjes Vetëvendosje! në përgatitjet për zgjedhjet e ardhshme.