Në ditën e dytë të qëndrimit të tij në kryeqytetin e Gjermanisë, kryeministri Albin Kurti, ka vazhduar takimet me përfaqësues politikë dhe deputetë të Bundestagut.
I shoqëruar nga zëvendësministri i Punëve të Jashtme, Kreshnik Ahmeti dhe ambasadori i Kosovës në Gjermani, Faruk Ajeti, kryeministri bashkëbisedoi me dhjetëra deputetë të Partisë Socialdemokrate të Bashkimit Demokristian (CDU), të Partisë së Gjelbër (Grune) dhe të Partisë së Lirë Demokratike (FDP).
Takimet i filloi me Rolf Mutzenich, deputetin dhe Kryetarin e Grupit Parlamentar të SPD-së, të cilin e falënderoi për ftesën që të marrë pjesë në ngjarjen e organizuar mbrëmë nga SPD në shënim të 75-vjetorit të Këshillit të Evropës.
Ndërkaq në një drekë pune takoi deputetët Michael Roth (SPD), Andreas Schwarz (SPD), Knut Abraham, (CDU), Michael Brand (CDU), Jurgen Hardt (CDU), Volkmar Klein (CDU), Volker Ulrich (CDU), Philip Kramer (Grüne), Max Lucks (Grnue), Boris Mijatovic (Grune), Ulrich Lechte (FDP) dhe Thomas Hacker (FDP).
Tema kryesore e bashkëbisedimeve ishte aplikimi i Kosovës në Këshillin e Evropës dhe rruga drejt anëtarësimit të plotë në këtë organizatë.
“Krahas mirënjohës për mbështetjen e deritanishme ndaj vendit tonë, kryeministri Kurti u bëri thirrje deputetëve gjermanë dhe qeverisë gjermane që të vazhdojnë ta përkrahin Kosovën edhe në hapin e fundit, mbi bazën e opinionit të raportueses Dora Bakoyannis, votës historike të Asamblesë Parlamentare të Këshillit të Evropës më 16 prill dhe regjistrit të kornizës ligjore, të drejtave të njeriut, sundimit të ligjit dhe demokracisë në Kosovë”, u tha në njoftimin për media të Kryeministrisë.