Drejtori i Drejtorisë për Arsim në Komunën e Vushtrrisë, Albanez Tahiraj, së bashku me stafin e Drejtorisë për Arsim, ka nisur sot vizitat zyrtare nëpër disa shkolla të komunës së Vushtrrisë.
Qëllimi i këtyre vizitave siç njofton Tahiraj është njohja nga afër me gjendjen e këtyre shkollave, duke paralajmëruar edhe viza të tjera ditëve në vijim.
“Kam kënaqësinë të ju njoftoj se nga sot, së bashku me stafin e Drejtorisë për Arsim, filluam serinë e vizitave zyrtare shkollë më shkollë, por edhe në institucionet parashkollore në tërë territorin e Komunës së Vushtrrisë.” ka shkruar Tahiraj.
Drejtori Tahiraj i ka konsideruar këto vizita si mundësi për të njohur më mirë nga afër nevojat dhe vizionin e secilit institucion shkollor, dhe parashkollor në komunën e Vushtrrisë, duke inkurajuar kështu bashkëpunimin e afërt me stafin e këtyre shkollave.
“Përmes këtyre vizitave, synojmë të thellojmë lidhjen tonë me çdo nivel të arsimit, pasi që këto vizita janë mundësi e jashtëzakonshme për të kuptuar më mirë sfidat dhe mundësitë e sistemit arsimor. Prandaj bashkë me komunitetin e arsimit, po kërkojmë sugjerime dhe mendime që do të na ndihmojnë të përmirësojmë cilësinë e arsimit në komunën tonë.” ka shkruar ndër të tjera Tahiraj.