Në përvjetorin e 145 të themelomit të Lidhjes së Prizrenit, kryetari i PDK-së Memli Krasniqi ka kujtuar 10 qershorin e vitit 1878 si ditë kur shqiptarët u bën bashkë për një qëllim të përbashkët, bashkimin e shtetit.
“Për herë të parë në shekuj, shqiptarët, nga të gjitha trevat, u mblodhën rreth një tryeze, duke i dhënë lidership dhe forcë – politike e ushtarake – qëllimit dhe synimit për mëvetësi, në një periudhë të sfidave të kohës “, ka shkruar ai ndër të tjera.
Postimi i tij i plotë:
Lidhja Shqiptare e Prizrenit, e themeluar nga delegatë të të gjitha viseve shqiptare, me 10 qershor të vitit 1878, saktësisht 145 vite më parë, ishte organizimi më i madh dhe përpjekja më e rëndësishme e shqiptarëve për bashkim e shtet, që nga koha e Skënderbeut.
Për herë të parë në shekuj, shqiptarët, nga të gjitha trevat, u mblodhën rreth një tryeze, duke i dhënë lidership dhe forcë – politike e ushtarake – qëllimit dhe synimit për mëvetësi, në një periudhë të sfidave të kohës.
Abdyl Frashëri, Ymer Prizreni e Sulejman Vokshi, do të mbeten përgjithmonë burrështetasit, veprat e të cilëve unifikuan, udhëheqën dhe frymëzuan shqiptarët gjatë gjithë shekullit pasues, për atdhedashuri e luftë për liri – deri te qëllimi final, shpallja e pavarësisë së Shqipërisë dhe Kosovës!