Kryeministri i Kosovës, Albin Kurti, ka thënë se bandat kriminale kanë sulmuar sot në Leposaviq gazetarët e pranishëm përpjekjeve të disa individëve për të shkaktuar trazira e dhunë.
Kurti ka thënë se “grupe ekstremistësh të kontrolluara nga Beogradi nuk e durojnë dot as policinë e as gazetarët. Policia e Kosovës i shërben drejtësisë dhe ligjit, gazetaria e Kosovës i shërben demokracisë dhe transparencës”.
“Sot në Komunën e Leposaviqit nga bandat kriminale janë sulmuar gazetarët që ishin të pranishëm gjatë përpjekjeve të disa individëve për të shkaktuar trazira e dhunë”, ka shkruar Kurti në një postim në Facebook, transmeton Telegrafi.
Ai ka thënë se “kameramani Bardh Bekteshi dhe gazetarja Dorentina Thaqi, kanë pësuar lëndime në kokë dhe trup. Kameramanët tjerë, Albin Rrahmani dhe Ardijan Shala kanë pësuar lëndime në trup. Në këmbë janë lënduar gazetaret, Laura Kerolli e Qendresa Sinani, kurse në krah ka marrë lëndime gazetari Pleurat Salihu”.
“Urojmë shërim të shpejtë për kameramanët dhe gazetarët. Ftojmë institucionet dhe diplomatët ndërkombëtarë të mbajnë qëndrim, dhe të mbështesin institucionet e Kosovës që të sjellin para drejtësisë të gjithë sulmuesit e Policisë së Kosovës, KFOR-it e sidomos gazetarëve”, ka shkruar kryeministri.
Policia e Kosovës ka konfirmuar të premten se nëntë gazetarë të mediave të Kosovës janë sulmuar nga grupe kriminale gjatë ditës në Leposaviq. Gazetarët ishin duke raportuar për zhvillimet në këtë pjesë të vendit.
Sipas policisë, disa prej tyre përveç shqetësimeve kanë pësuar edhe lëndime të ndryshme trupore, si dhe kanë pranuar tretman mjekësor.
Duke i cilësuar si akte të tmerrshme dhune, sulmet ndaj gazetarëve i kanë dënuar presidentja e Kosovës, Vjosa Osmani, kryeparlamentari Glauk Konjufca, ambasadori i SHBA-së në Kosovë, Jeff Hovenier dhe shefi i Zyrës së BE-së në Kosovë, Tomas Szunyog si dhe partitë politike në vend. /Telegrafi/