Kryeministri i Kosovës Albin Kurti, e ka falënderuar ambasadorin e ri jorezident të Australisë për Kosovë Richard Rodgers, për ndihmën që vendi i tij ia dha Kosovës gjatë luftës.
Kurti po ashtu ishte mirënjohës që Australia ishte e teta që e njohur Pavarësinë e Kosovës, vetëm një ditë pas shpalljes.
“Ata folën edhe për raportet dypalëshe ndërmjet vendeve dhe për mundësitë e reja të bashkëpunimit, teksa kryeministri e njoftoi për progresin në sundimin e ligjit, zhvillimin ekonomik dhe demokratik në dy vitet e fundit”, thuhet në njoftimin e Zyrës së Kryeministrit përcjell Klankosova.tv
Ndërkaq diplomati australian u shpreh se dy vendet ndajnë dëshirën e përbashkët për sundim të ligjit dhe dashurinë për demokraci dhe se pret qe puna e tij të jetë më lehtë për shkak të vlerave të njëjta që ndajmë.
“Ndër të tjerash, kryeministri Kurti dhe ambasadori Rodgers biseduan edhe për rreziqet që dezinformimi paraqet për shoqëritë tona dhe demokracinë, si dhe për domosdoshmërinë e trajtimit të tij. Gjithashtu, diskutuan edhe për raportet ndërmjet Kosovës dhe Serbisë dhe për procesin e dialogut të ndërmjetësuar nga Bashkimi Evropian, me theks te Marrëveshja Bazike e dakorduar me 27 shkurt dhe Aneksi i saj me 18 mars. Në lidhje me këtë, kryeministri Kurti tha se ajo duhet të zbatohet e plotë, shpejt dhe pa kushtëzime”, thuhet në njoftim.
Kryeministri Kurti e uroi ambasadorin Rodgers për përgjegjësinë e re, duke i dëshiruar suksese në përmbushjen e saj dhe duke i ofruar bashkëpunim të afër të tij dhe Qeverisë së Republikës së Kosovës.