Deputeti i Lëvizjes Vetëvendosje, Haxhi Avdyli, vlerëson se nisma “Ballkani i Hapur” është bllokuar në Gjermani.
“Ballkanit t ë hapur” iu vu dryni në Berlin, ka shkruar ai në Twitter, transmeton KlanKosova.tv.
“Tregtarëve të dështuar të vëllazërim-bashkimit iu mbetet të kthejnë sytë kah Brukseli e Washingtoni, ose të lëshojnë udhë”.
Kujtojmë se gjatë ditës së djeshme, kryeministri i Shqipërisë, Edi Rama, në Konferencën e 18-të të nismës Adriatiko-Joniane, ka folur për raportet që duhet t’i kenë shtetet e Ballkanit mes vete, duke thënë se duhet të harrohen, sipas tij, rrëmujat e së kaluarës.
“Fqinjët nuk i zgjedh. Gjyshja ime më tha ‘komshiu i lumtur ,shtëpi e lumtur’. E kundërta është thjesht një makth. Serbia nuk do të shkojë kurrkund, ashtu si dhe kroatët, malazezët. Të gjithë ne do të jemi këtu. Na duhet ta zgjidhim dhe të rritemi dhe të harrojmë të gjithë rrëmujën që kemi krijuar për njëri-tjetrin”.
“Të mos harrojmë sa shumë kanë përfituar të tjerët në kurrizin tonë, mbi shpatullat tona, për shkak të telasheve që kemi hapur vetë. Sa e madhe është humbja për të investuar në urrejtje. Rruga është ende e gjatë për ne. Por sot jemi një vend më i mirë, krahasuar me ku ishim”, u shpreh Rama.
Deri më tani pjesë e Ballkanit të Hapur janë: Shqipëria, Serbia dhe Maqedonia e Veriut.