Ambasadori ShBA-së në OSBE, Michael Carpenter, ka bërë komentet e tij rreth Raportit të Shefit të Misionit të OSBE-së në Kosovë, Michael Davenport, duke thënë se Shtetet e Bashkuara mbështesin fuqimisht punën e misionit dhe vlerësojnë bashkëpunimin e ngushtë për të mbështetur zhvillimin e Kosovës si një anëtare e sigurt, demokratike dhe gjithëpërfshirëse e komunitetit Evropian të kombeve.
“Ne përshëndesim angazhimin e vazhdueshëm të misionit përgjatë elementeve thelbësore të mandatit tuaj, duke përfshirë demokratizimin, sigurinë publike, si dhe të drejtat e njeriut dhe të komunitetit. Ne jemi dakord që ndërtimi i institucioneve është një prioritet i rëndësishëm. Kjo punë është edhe më e rëndësishme sot duke pasur parasysh luftën e Rusisë kundër Ukrainës, e cila nënvizon nevojën për të mbrojtur vlerat mbi të cilat bazohet OSBE-ja dhe që Misioni kërkon të avancojë përmes mandatit dhe punës së tij”, thuhet në deklaratën e Ambasadorit Carpenter, transmeton KlanKosova.tv
Më tej ai ka thënë se është për të ardhur keq që Kosova nuk është e anëtare e OSBE-së, duke u shprehur se presin me padurim ditën kur ajo do të anëtarësohet.
“Shtetet e Bashkuara kërkojnë paqe, drejtësi dhe prosperitet në një Kosovë që është plotësisht e integruar në bashkësinë ndërkombëtare dhe pjesë e një Evrope të lirë, elastike dhe të lulëzuar. Vetëm duke dëgjuar drejtpërdrejt nga zyrtarët e vendit pritës, në bashkëpunim me Misionin e OSBE-së në Kosovë, mund të kuptojmë plotësisht dinamikën në terren dhe të përcaktojmë se si t’i trajtojmë ato më së miri. Prandaj, ne e mirëpresim këtë praktikë dhe inkurajojmë që ajo të vazhdojë edhe në të ardhmen. Ne besojmë se është për të ardhur keq që Kosova nuk është anëtare e këtij organi dhe për këtë arsye nuk është në gjendje të flasë vetë. Ne e presim me padurim ditën kur Kosova të jetë shtet pjesëmarrës i OSBE-së dhe kjo mund të ndodhë”.
Carpenter tutje vlerësoi procesin e Zgjedhjeve Lokale, të mbajtura vitin e kaluar, për të cilat tha se ishin një arritje.
“Zgjedhjet lokale në tetor dhe nëntor 2021 ishin një arritje e rëndësishme në atë që ishin cikli i parë, siç e vutë re, i plotë zgjedhor komunal i kryer nga Komisioni Qendror i Zgjedhjeve i Kosovës, pa ndihmën e OSBE-së. Në mënyrë domethënëse, në këto zgjedhje fituan mandatin aktorë politik të panjohur më parë , një dëshmi e gjallërisë së demokracisë së Kosovës. Ne inkurajojmë prioritizimin e vazhdueshëm të përpjekjeve të ekipit tuaj për demokratizim, së bashku me qeverisjen e mirë dhe barazinë gjinore në qeverisjen vendore”.
Ndërkohë, Ambasadori Carpenter po ashti përgëzoi OSBE-në, për gatishmërinë që shfaqën për të mbështetur pjesëmarrjen e serbëve të Kosovës në zgjedhjet e Serbisë.
“Ne pajtohemi se angazhimi i vazhdueshëm me institucionet e Kosovës përmes trajnimeve, ndihmës dhe mbështetjes për reformat e planifikuara është thelbësor për promovimin e standardeve ndërkombëtare dhe praktikave më të mira. Ne vërejmë përshkrimin e raportit tuaj për aktivitetet e vazhdueshme të Misionit për të drejtat e njeriut dhe sigurinë publike, të cilat janë aspekte kyçe të krijimit të një mjedisi gjithëpërfshirës dhe pjesëmarrës për të gjithë qytetarët e Kosovës”.
Tutje Carpenter foli edhe për sulmin ndaj Policisë së Kosovës në veri të vendit, për të cilat tha se duhet të hetohen tërësisht.
“Ne monitoruam nga afër incidentet që synonin policinë në veri dhe dënuam sulmet, të cilat duhet të hetohen tërësisht. Këto sulme ndodhën ndërsa autoritetet sovrane përgjegjëse për ruajtjen e paqes dhe sigurisë po kryenin detyrat e tyre zyrtare. Ne paralajmëruam kundër spekulimeve që do të rrisin tensionet dhe do të dënojmë çdo përpjekje për të penguar këtë punë thelbësore”./Klankosova.tv/