Në Kosovë sot do të mbahet raundi i dytë i zgjedhjeve lokale në gjithsej 21 komuna.
Të drejtë vote në këtë raund të dytë kanë 1 milion e 260 mijë e 571 qytetarë, këta votues të drejtën e tyre mund ta ushtrojnë në 575 qendra të votimit me gjithsej 1,638 mijë vendvotime, njofton Klankosova.tv.
Numri i vëzhguesve të partive politike është 9,199, ndërsa numri i vëzhguesve të iniciativave qytetare është 88, numri i vëzhguesve të ambasadave të huaja është 50, numri i vëzhguesve të organizatave joqeveritare vendore është 319, numri i vëzhguesve të organizatave ndërkombëtare është 118 si dhe numri i vëzhguesve të Avokatit të Popullit është 69.
Qytetet në të cilat do të votohet janë Gjakova, Drenasi, Gjilani, Dragashi, Istogu, Kaçaniku, Klina, Fushë Kosova, Kamenica, Obiliqi, Rahoveci, Podujeva, Prishtina, Prizreni, Shtimja, Vitia, Vushtrria, Malisheva, Juniku, Mamusha dhe Kllokoti, ndërsa në raundin e parë janë zgjedhur kryetarët e 17 komunave.
Sipas vendimit të KQZ-së, numri i fletëvotimeve që janë shtypur për këtë raund është 1 milion e 136 mijë e 150 fletëvotime. Edhe për këto zgjedhje, janë shtypur më pak fletëvotime, 10 përqind apo rreth 125 mijë fletëvotime me pak se numri i përgjithshëm i votuesve të këtij raundi.
Sot nga ora 07:00 deri në ora 19:00, qytetarët e Kosovës me të drejtë vote, do të kenë mundësi për të votuar për të zgjedhur kryetarët për 21 komunat e vendit.