Kryetari i ri i zgjedhur i Gjilanit, Alban Hyseni, referuar fitores që arriti në këtë komunë, duke mposhtur kryetarin shumëvjeçar Lutfi Hazirin, është pyetur nëse do ta shihte veten në të ardhmen edhe si kryeministër.
Hyseni i cili vie nga radhët e Lëvizjes Vetëvendosje, u shpreh se kjo çështje i përket së ardhmes, dhe anise e vlerësoi lartë punën e Albin Kurtit, ai thotë në Rubikon me Adriatik Kelmendin se nuk do ta kopjonte assesi si kryeministër, njofton Klankosova.tv.
”Nuk e di nëse është pozicioni i kryeministrit për mua, është çështje që i përket të ardhmes”.
”Unë për vete nuk e marr guximin të mendoj për një pozicion të tillë, sepse e konsideroj se është punë me përgjegjësi të jashtëzakonshme. Por, sidoqoftë, kjo mund të jetë pjesë e së ardhmes”.
”Për mua, Albin Kurti është një model i angazhimit politik e publik. Unë shoh shumë frymëzim tek Albin Kurti, por besoj është e gabuar të shohim një model që duhet ta kopjojmë. Pra unë besoj tek origjinaliteti, tek autenticiteti i secilit individ e karakter dhe ruajtja e këtij origjinaliteti tek unë personalisht ka qenë njëra prej elementeve që unë kam dasht ta bëjë me çdo kusht”.
Rubikon: Ju pra e vlerësoni kryeministrin Albin Kurti, por nuk doni ta kopjonit?
”Por jo se edhe nuk mund ta kopjoj”.
”Është e pamundur ta kopjojmë njëri-tjetrin. Secili prej nesh ka tipare dhe veçori të veçanta. Nuk besoj që na bën mirë të kopjojmë figura të tjera”.
”Kjo është jo e mirë besoj”.