Ministri i Financave, Punës dhe Transfereve Hekuran Murati, ka njoftuar se është bërë pagesa për 2 mijë e 230 lehona që kanë aplikuar gjatë muajit tetor.
Murati tha se nesër do të bëhet ekzekutimi i pagesave të dyta për ato lehona që kanë aplikuar më herët.
“Sot është ekzekutuar pagesa për 2,230 lehona përfituese që kanë aplikuar gjatë muajit tetor. Ndërsa nesër do të ekzekutohet pagesa e dytë edhe për lehonat që kanë aplikuar më herët, dhe tashmë janë në sistem. Gjithsej, mbi 4,400 përfituese. Njëkohësisht, është ekzekutuar edhe pagesa retroaktive për shtesat për fëmijë, për 809 përfituese që muajin e kaluar i kishin llogaritë bankare jo-valide”.
Ai kërkoi mirëkuptim për vonesat e pagesave sepse sipas tij ka pasur fluks të madh të aplikantëve.
“Këtë muaj kemi pasur fluks të madh aplikimesh dhe na ka marrë më shumë kohë validimi e procesimi i pagesave – mbi 90 mijë pagesa të procesuara gjithsej, pa llogaritur masat tjera të pakos. Andaj shpresojmë në mirëkuptim për këtë vonesë, të cilën shpresojmë ta evitojmë muajve në vijim”.