Pandemia COVID-19 ka dëmtuar jashtëzakonisht shumë sektorin e gastronimisë, ku në Kosovë rrezikohen me mbylle 13 mijë biznese, shkruan Gazeta Metro.
Hysen Sogojeva kryetar i Oda e Hotelerisë dhe Turizmit e Kosovës (OHTK) gjatë takimit me Komisionin për Ekonomi, Industri, Ndërmarrësi dhe Tregti ka thënë se pa pasur mbështetje nga shteti me mbi 1 miliard euro për sektorin e hotelerisë dhe turizmit, rrezikohen të mbyllen mijëra biznese të këtij sektori për shkak të humbjeve të mëdha si pasojë e pandemisë Covid-19.
“Jam kategorik që të hapet ky sektor dhe merr masa ndaj atyre që nuk respektojnë masat. Megjithatë, është e nevojshme se për t’i shpëtuar bizneset e sektorit të hotelerisë dhe turizmit nga mbyllja duhet intervenim nga shteti me mbi 1 miliardë euro, pasi dëmet janë të mëdha që janë shkaktuar tash e mbi një vit nga mbyllja”, tha ai.
Për këtë mbyllje, Sogojeva nuk ka përjashtuar mundësinë që të organizojnë edhe protesta nëse vazhdon kjo mbyllje e këtij sektori nga Qeveria.
Po ashtu Sogojeva ka kërkuar në këtë takim të themelohet Agjencia Kombëtare e Turizmit, që sipas tij, do ta ndihmonte këtë sektor për zhvillim./gazetametro.net