Shërbimi Spitalor Klinik dhe Universitar i Kosovës ka njoftuar se ka ulje të numrit të pacientëve të cilët janë duke u trajtuar nga koronavirusi në klinikat e QKUK-së dhe në spitalet e përgjithshëm.
Sipas njoftimit të ShSKUK 676 pacientë janë duke u trajtuar nga COVID-19 ku nga ta 542 janë raste të konfirmuar, 27 prej tyre janë në gjendje të rënduar shëndetësore, kurse 526 pacientë janë nën asisitimin e oksigjeno-terapisë.
Në QKUK momentalish të shtrirë dhe nën asistencë mjekësorë janë 287 pacientë ku, 236 prej tyre janë nën asistim të oksigjeno-terapisë, ndërsa 15 prej tyre janë në gjendje të rënduar shëndetësore.
Sipas klinikave numri më i madh i pacentëve të shtrirë është në atë Infektive në të cilën po marrin shërbim mjekësor 101 pacientë, kurse vetëm dy pacientë të infektuar me COVID-19 janë duke u trajtuar në Klinikën e Gjinekologjisë, transmeton Klan Kosova.
Ndërkaq, sa i përket spitaleve të përgjithshme numri më i madh i trajtimit të pacientëve është duke u kryer në Spitalin e Pejës me 87 pacientë, ndërsa në atë të Vushtrrisë të shtrirë dhe nën asistencë mjekësore janë vetëm 17 pacientë.