Mediumi i njohur botëror AFP i ka kushtuar sot një shkrim kandidates për kryeministre të Kosovës, Vjosa Osmani. Në të thuhet se ajo mund të ngrihet mbi politikën “e ndyrë” të Kosovës, pasi synon të bëhet kryeministrja e parë grua e vendit.Nëse Vjosa Osmani, e cila thotë se gjinia e saj është një përparësi, do të arrijë qëllimin e saj në zgjedhjet e 6 tetorit, kjo do të përbënte një ndryshim rrënjësor në një shoqëri thellësisht patriarkale siç është Kosova.Duke parë mbrapa fëmijërinë e saj në Kosovën e veshur me konflikte, Vjosa Osmani kujton se si dëgjonte qetësisht, ndërsa dhjetëra burra mblidheshin në shtëpinë e babait të saj për të diskutuar të ardhmen politike të Kosovës.
Dy dekada më vonë, 38-vjeçarja është e vendosur të jetë ajo që do të drejtojë mbledhjet pasi ka dhënë ofertën e saj për t’u bërë Kryeministrja e parë grua e Kosovës në zgjedhjet e 6 tetorit.Ky do të ishte një ndryshim rrënjësor në një shoqëri patriarkale, ku burrat mbretërojnë në politikë, biznes dhe shpesh edhe në shtëpi.Por, Osmani thotë se gjinia e saj është një përparësi.
“Unë mundem pikërisht sepse jam grua”, i tha ajo AFP-së nga selia e partisë së saj, Lidhja Demokratike e Kosovës (LDK).Profesoresha e drejtësisë me flokë kaçurrele, e shndërruar në deputete të parlamentit, shpreson të përfitojë nga vala e zhgënjimit të qytetarëve ndaj burrave që e kanë shndërruar demokracinë e re nga pavarësia e saj më 2008, në një vend të korruptuar dhe të varfër.
Krahina e dikurshme ende drejtohet nga komandantët etnikë shqiptarë, të cilët luftuan Serbinë gjatë luftës 1998-99 dhe për të cilët barazia gjinore nuk është me rëndësi.
Përderisa një kuotë siguron përfaqësimin e grave në parlament, pozitat vendimmarrëse mbeten në pjesën më të madhe arenë burrash.
Burrat drejtojnë të gjitha komunat e Kosovës (38), ndërsa kabineti i mëparshëm qeveritar me 21 anëtarë mburrej me vetëm një ministre grua.
Presidenti Hashim Thaçi gjithashtu ka vetëm një grua në kabinetin e këshilltarëve politikë.
Ndërsa, parlamenti emëroi një presidente femër, Atifete Jahjaga, në 2011, njerëzit kurrë nuk kanë zgjedhur një grua për të udhëhequr qeverinë.
Politikë e ndyrë
Vjosa Osmani dëshiron ta ndyrshojë këtë mentalitet dhe ta rrisë mbështetjen për njërën prej partive më të mëdha dhe të vjetra të Kosovës, themeluesi i së cilës, Ibrahim Rugova, konsiderohet “babai i kombit”.
Analistët thonë se ajo ka një shans të madh për të marrë një pjesë të madhe të votave në ditën e zgjedhjeve.
Megjithatë, skena e fragmentuar politike e Kosovës do të thotë që asnjë parti nuk do mund të fitojë një shumicë absolute, duke e lënë Osmanin të krijojë një koalicion për të hequr nga qeverisja PDK-në, në pushtet që nga viti 2007.
“Ne do t’i heqim nga pushteti ata që e kanë ngulfatur Kosovën”, u tha ajo mbështetësve gjatë një tubimi elektoral të martën në mbrëmje në Pejë.
“Më 6 tetor, ne do t’i dërgojmë PDK-në dhe partnerët e saj të korruptuar në një opozitë të gjatë.”
Pasi studioi të drejtën ndërkombëtare në SHBA dhe punoi si profesoreshë, Vjosa Osmani u bë deputete në vitin 2011, duke ardhur ballë për ballë me ato që ajo i përshkruan si skena politike “të ndyra” të Kosovës.