Vjosa Osmani, kandidate e LDK-së për kryeministre, ka thënë se është e sigurt fitorja e kësaj partie në zgjedhjet e 6 tetorit, por synojnë të thellojnë dallimin nga partitë tjera.
Në Interaktiv të KTV-së, ajo ka thënë se çdo sondazh e nxjerr LDK-në në vend të parë.
“Kemi sondazhe. Janë duke bërë edhe partitë tjera. Herëve të kaluara dilnin në konferenca se po fitojnë e tash pasi që në çdo sondazh po prijmë ne, s’po dalin publikisht. Sondazhet edhe pse janë tregues, s’lejoj të na ndalin punën, por sa më shumë po rritet epërsia jonë dhe rritet dallimi mes neve e partisë së dytë, po na shtohet vullneti për punë në terren. S’kemi asnjë dyshim për fitore. Synim kemi të thellojmë fitoren. Na ndihmon për negociata për qeverinë e re. Por me rëndësi është përtej fitores sonë të ringjallet një besim i qytetarëve në përfaqësuesit e tyre. Kemi pasur një përqindje të elektoratit të fjetur e është tejet me rëndësi për ne që ata të zgjohen e të bëhen pjesë e ndryshimit që po e pret Kosovën. Po përmendet referendumi, por në të vërtetë është ashtu, sepse përcaktohen minimum edhe dy dekada të tjera të rrugës e jo veç katër vjet”, ka thënë ajo.