Duke i komentuar dyshimet se pas fitores në zgjedhje, LDK-ja do të shkojë në koalicion me PDK-në, kandidatja e Lidhjes Demokratike të Kosovës për kryeministre, Vjosa Osmani, ka thënë të hënën se të gjithë qytetarët e njohin konsistencën e saj politike dhe kur ajo thotë “kurrë me PDK-në do të mbetet kurrë”.
“Unë dua t’ju siguroj edhe një herë qytetarë të Prishtinës për një gjë: kurrë nuk e kam keqpërdor votën dhe besimin tuaj. Një parti po del derë më derë dhe po dezinformon, se kinse LDK-ja po shkon në koalicion me PDK-në. Secili qytetar racional i Prishtinës dhe gjithë Kosovës e dinë që kjo është një gënjeshtër e kulluar”, ka thënë Osmani gjatë një takimi me qytetarët e Degës së II-të të LDK-së në Prishtinë.
Ajo ka shtuar se “ata që po e helmojnë popullin e Kosovës me gënjeshtra dhe shpifje të tilla, ata janë të njëjtit që nga studiot televizive po thonë se po shpresojmë që disa deputetë të PDK-së dhe AAK-së do t’ju bashkohen atyre për ta krijuar Qeverinë’.
“Ata vetë i kanë sytë kah PDK-ja, derisa LDK-ja kurrë nuk do t’i ketë sytë kah ata”.