Kandidatja për deputete nga radhët e AAK-së Donika Kadaj Bujupi, u zotua se do të angazhohet që ta bëjë me të lehtë jetën e qytetarëve në vend, duke punuar për drejtësi pa ndikime, ekonomi e prodhim, të drejtën e grave në pronë e trashëgimi.
Kadaj Bujupi, tha se në qeverinë e re në krye me Ramush Haradinajn, do të realizohen shtesat e fëmijëve, projekt thuajse i përfunduar që e ka nisur ajo.
“Do të ketë po ashtu një angazhim të posaçëm për kushte më të mira për nënat vetëushqyese dhe për jetë më të dinjitetshme në përgjithësi”, u shpreh Kadaj Bujupi, përmes një postimi në faqen e saj zyrtare në rrjetin shoqëror “Facebook”.
Postimi i plotë:
100% Kosovë për të gjithë qytetarët, por veçanërisht për vajzat dhe gratë. Sepse mbi to është shtypja më e madhe, pabarazia më e lartë. Gratë janë të diskriminuara, si në punësim, e si në trajtim të përgjithshëm.
S’ka më kohë! Do të angazhohemi që jetën ta bëjmë të mundshme në vendin tonë, duke punuar për drejtësi pa ndikime, ekonomi e prodhim, të drejtën e grave në pronë e trashëgimi. Qeveria jonë do t’i realizojë shtesat e fëmijëve, projekt thuajse i përfunduar që e kisha nisur vetë. Do të ketë po ashtu një angazhim të posaçëm për kushte më të mira për nënat vetëushqyese dhe për jetë më të dinjitetshme në përgjithësi.
Me 18 muaj qeverisje është dëshmuar se Qeveria Haradinaj fjalët i bën vepra e vendime, prandaj do të fitojmë në 6 tetor.