Kandidati për deputet nga Lëvizja Vetëvendosje, Haki Abazi, ka thënë në tubimin në Ferizaj se nuk ka errësirë që mund ta mbulojë dritën që sipas tij ka ardhë – Lëvizjen Vetëvendosje.
“Nuk ka forcë që mund ta ndalë LVV, numrin 126 që do të jetë numri me i votuar bashkë me numrin 1, Kryeministrin Albin Kurti”, ka thënë Abazi, njofton Klan Kosova.
“Erdhi dita që të votojmë me hare, dinjitet, largpamësi dhe shumë vendosmëri. 6 tetori është shansi ynë, shansi i Kosovës. Më 6 tetorit do t’i japim fund pushtimit pas çlirimit të 99-ës. Do t’i japim fund hajnisë, krimit e korrupsionit”.
“Më 6 tetor e përfundojmë epokën e nënshtrimit dhe ngritemi bashkë për ta votuar 126 dhe Albin Kurtin për Kryeministër të Kosovës. Le të shkruhet në kujtesën tonë dhe të gjeneratave që me 6 tetor ka marrë fund diktatura kapilare e pushteteve të së kaluarës”.
Ai ka thënë se nuk pranojnë asnjë lloj diktature.
“Më 6 tetor le të skalitet kontributi i mërgatës për të na përkrahur, për ta dërguar vendin drejt zhvillimit që ata e presin për t’u kthyer këtu. 6 tetori është vula. Albin Kurti është njeriu që kurrë nuk ka rënë pre e kompromiseve të dëmshme, është njeriu që ka falë në kohëra të vështira dhe që nuk është ndarë kurrë nga rruga e kombit dhe fatit të shtetit tonë”.
Përveç Abazit në sallën e sporteve në Ferizaj kanë folur edhe pretendentët tjerë për t’u zgjedhur deputetë: Arbërie Nagavci, Valon Ramadani dhe Xhelal Sveçla.