Partia Demokratike e Kosovës ka nisur fushatën elektorale me tubim madhështor në qytetin e Mitrovicës.
Kandidatë për deputetë në krye me kryetarin e kësaj partie, Kadri Veselin, që njëherësh është edhe kandidat për kryeministër, anëtarë, simpatizantë, e qindra qytetarë po marrin pjesë në këtë hapje në sheshin e Mitrovicës, që është edhe vendlindja e Veselit.
Kryetari i degës së PDK-së në Mitrovicë, Bedri Hamza, mori fjalën para të pranishmëve duke thënë se kjo është partia më e madhe në vend dhe e para, shtetformuese dhe shtetndërtuese.
“Çdo sukses në shtetin tonë mbart vulën e PDK-së. Parti me vizion dhe synim të përhershëm. S’jemi të pagabueshëm dhe perfekt, por jemi të përgatitur, të guximshëm për të vazhduar punën. Jemi krenar që Veseli është i lindur dhe rritur në Mitrovicë, në një familje punëtore, bujare dhe kombëtare. Një njeri familjar, intelektual dhe i guximshëm, dhe sigurisht ky masivitet garanton fitoren e PDK-së në zgjedhjet e 6 tetorit. Z. Veseli e ka vizionin e qartë, të gjitha atributet për një kryeministër. Urime fitorja, urime z. kryeministër”, ka thënë Hamza.