Kryetari i Kuvendit të Kosovës, Kadri Veseli ka folur lidhur me lajmin e publikuar në media, se ai ishte ftuar nga Gjykata Speciale javën e kaluar dhe kishte shkuar atje.
“Më duket se lajmi është publikuar sa kam qenë në ajër. Nuk kam qenë i ftuar, kjo është çka është kryesore nga Gjykata Speciale. Edhe pse unë kam thanë, e thash edhe më herët, ne do t’i përgjigjemi çdo sfide, keni parasysh, por, nuk ka pasur ftesë, nuk kam ditë asgjë të jem shumë i sinqertë. Unë kam zbritur nga avioni, kam qenë i shoqëruar nga zëvendëskryeministri dhe zëvendëskryetari i Partisë Demokratike të Kosovës”, ka thënë Veseli në intervistë për Periskopin.
Veseli ka thënë se në momentin që do të kishte ftesë nga Gjykata Speciale, do ta bënte publike.
“Më ka bë përshtypje negative, po ta them drejt, sikurse isha duke folë, pas një konference që kisha këtu për Tribunalin Ndërkombëtar për krime lufte. Sidoqë të jetë, në momentin kur të merret çdo ftesë nga Gjykata Speciale, duhet të bëhet publike, unë do ta bëja publike”, ka thënë Veseli.