Qeveria e Kosovës i ka ndarë 471 mijë euro për zgjedhjet në veri.
Këtë e ka konfirmuar për “Zërin”, zëdhënësi i KQZ-së, Valmir Elezi. Sipas tij, për rundin e parë janë të planifikuar 315 mijë kurse për të dytin – 156 mijë. Tutje ai ka thënë se këto janë vetëm planifikime dhe tek pas përfundimit të tyre do të dihet e tërë kosotoja.
“Komisioni Qendror i Zgjedhjeve ka miratuar planin e buxhetit për organizimin e zgjedhjeve të jashtëzakonshme në këto komuna. Shuma e mjeteve të planifikuara është 471 mijë euro, për rundin e parë 315 mijë euro, ndërsa për rundin e dytë 156 mijë euro dhe në përputhje me detyrimet ligjore KQZ-ja ka planifikuar edhe rundin e dytë të zgjedhjeve. Këto janë vetëm planifikime, çka do të thotë se ne duhet të presim përfundimin e gjithë procesit zgjedhor për të ditur koston e saktë të këtyre zgjedhjeve. Pas përfundimit të procesit zgjedhor mjetet e pashpenzuara do të kthehen në buxhetin e shtetit”, ka thënë ai, shkruan “Zëri”.
Sa i përket përgatitjeve për zgjedhje, ai ka thënë që gjithçka po shkon në rregull.
“Komisioni Qendror i Zgjedhjeve është duke vazhduar me përgatitjet për organizimin e këtyre zgjedhjeve. Mund të themi se përgatitjet në terren po vijojnë sipas ritmit, planifikimeve të parapara dhe nuk ka ndonjë gjë për të veçuar në kuptimin e ndonjë problematike, e cila do ta pengonte ose do ta vononte këtë organizim”, ka shtuar ndër të tjera ai.