Petar Petkovic, ndihmësdrejtori i të ashtuquajturës Zyrë për Kosovën në qeverinë e Serbisë dhe kandidati i listës serbe për Komunën e Mitrovicës së Veriut, Goran Rakic kanë folur për zgjedhjet e 19 majit, duke premtuar se do të implementohet plani i presidentit të Serbisë, Aleksandar Vucic dhe të gjitha direktivat e Beogradit, transmeton Gazeta Metro.
Petkovic dhe Rakic thanë të premtën se zgjedhjet për kryetarë komunash në veri të Kosovës, janë një referendum për dhe kundër mbijetesës së popullit serb në atë pjesë.
“Kjo fitore është e nevojshme për ta vërtetuar se vendosmëria e popullit serb për të mbrojtur dinjitetin e tyre është i pakalueshëm. Qytetarët e veriut të Kosovës ishin gjithmonë të gatshëm të vetë-sakrifikohen për të mbrojtur të drejtën e tyre për të ekzistuar”, tha Rakic për b92.
“Nuk ka asnjë mënyrë për të vrarë vullnetin e popullit serb për të luftuar për ekzistencën e tyre dhe për të drejtat e tyre”, tha Rakic duke kërkuar të gjithëve të dalin në zgjedhjet e së dielës.
Petkoviq theksoi se fitorja e Listës Serbe është e padiskutueshme dhe se të gjitha projektet e iniciuara nga presidenti serb, Aleksandar Vucic, Qeveria e Serbisë dhe Marko Djuric do të vazhdojnë të implementohen./gazetametro.net