Kryeministri i vendit, Ramush Haradinaj, është takuar sot me rektorin UP-së Marian Dema me të cilin ka folur për planifikimin e avancimit të Universitetit të Prishtinës.
Haradinaj përmes një statusi në rrjetin social Facebook, ka thënë që UP është aset kombëtar dhe pikë orientuese e zhvillimit të shoqërisë tonë.
Postimi i plotë:
Universiteti i Kosovës është aset kombëtar dhe pikë orientuese e zhvillimit të shoqërisë sonë. Me qëllim të avancimit të arsimit të lartë në vendin tonë sipas standardeve globale, prita sot rektorin Marjan Dema, së bashku me disa nga dekanët e UP-së, nga të cilët u informova për sfidat me të cilat përballet ky institucion. Biseduam posaçërisht për mundësinë e modernizimit dhe rifunksionalizimit të laboratorëve, rritjen e efektshmërisë së instituteve nëpër fakultete, si dhe rigjenerimin e kapaciteteve kadrovike në fushat deficitare, veçmas në inxhinierinë elektrike dhe në fushën e matematikës. Si nismë e rrugëtimit tonë të përbashkët, që Universiteti i Prishtinës të jetë në hap me trendet bashkëkohore të arsimit, u dakorduam që të bëhet një plan operacional, që përfshinë rishqyrtimin e normativave ligjore të arsimit të lartë. /Lajmi.net/