Ministri i Ministrisë së Drejtësisë, Abelard Tahiri u shpreh se Kushtetuta e Kosovës është dokument që garanton sovranitetin shtetëror të Kosovës, raporton Zëri.info.
“Kushtetuta jonë është mishërim i një rendi politik e shoqëror që bazohet në idealet tona par një shoqëri të drejtë. Është garanci për komunitetet por mbi të gjitha është garanci e sovranitetit tonë shtetëror”, ka thënë Tahiri.
Sot në ceremoninë e shënimit të 11 vjetorit të ditës së Kushtetutës së Kosovës, Tahiri u shpreh se duhet të punohet që zbatimi i Kushtetutës të jetë rrëfim i secilit qytetar në Kosovë.
“Baza e një shoqërie demokratike është sundimi i ligjit dhe baza e sundimit të ligjit është Kushtetuta. Pas 11 viteve kemi tejkaluar së bashku sfida të ndryshme dhe sot ajo nuk është thjesht dokument i rendit tonë juridik. Mbi të gjitha duhet të punojmë për një gjendje ku zbatimi i Kushtetutës është rrëfimi ynë i përditshëm”, ka thënë ai./Zëri