Gjykata Themelore në Mitrovicë ka caktuar masën e paraburgimit prej 30 ditësh dy të dyshuarve A.H dhe Q.H, lidhur me rastin e shembjes së ish hotel “Adriatiku” kumbet i vdekur 27 vjeçari Visar Behrami.
Të lartpërmendurit dyshohen për kryerjen e veprës penale “shkaktim i rrezikut të përgjithshëm”.
Sipas kërkesës së prokurorisë të dorëzuar në gjykatë, ekziston dyshimi i bazuar se të dyshuarit A.H dhe Q.H me datën 22.04.2019 rreth orës 16.55, sipas marrëveshjes gojore mes vete dhe pa konsultimin e ekspertit përkatës për rrënimin e objekteve kanë filluar t’i kryejnë punët në objektin ndërtimor në objektin e ish-hotelit Adriatik, të cilën pronë i pandehuri A.H e ka marrë me qera dhe në cilësinë e punëdhënësit, ndërsa i pandehuri Q.H në cilësinë e punëkryesit.
Prokuroria ka bërë të ditur se në kohën kur punëtorët – dëshmitarët A.M, M.M dhe S.H po pastronin objektin në katin e parë, viktima V.B kishte hipur në skelë dhe po prente shtyllën e katërt me rradhë të katit të parë të objektit, në këtë moment punëtorët-dëshmitarët e vërejnë se po shembet një pjesë e objektit dhe fillojnë të ikin në drejtim të derës së hyrjes, ndërsa viktima nuk arrin që të ikë dhe i njëjti mbetet nën rrënojën e objektit, dhe pas disa orëve nxjerrët pa shenja jete.