Adnan Merovci, njeriu më i afërt i ish-presidentit Ibrahim Rugova, ka shpalosur detaje nga qëndrimi i delegacionit të Kosovës në Konferencën e Rambujesë, 20 vjet më parë, ku duhej të nënshkruhej marrëveshja me Serbinë.
Në një fragment nga libri i tij “Kështjella e (mos) Marrëveshjes”, Merovci ka treguar një detaj nga data 23.02.1999, kur gjatë qëndrimit në Rambuje presidenti Ibrahim Rugova, kishte refuzuar një takim me ministrin e atëherëshëm të Punëve të Jashtme të Shqipërisë, Paskal Milo.
Postimi i plotë i Merovcit:
“Veç fakte!
Saktë para 20 vitesh, Delegacioni i Kosovës në Rambuje nënshkroi “betimin” e pranimit të Marrëveshjes që ishte më i rëndësishëm se sa vet nënshkrimi solemn i Marrëveshjes së Rambujesë 22 ditë më vonë (18.03.1999) në Paris.
“DITA 18″
RUGOVA refuzon takimin me Paskal MILON
RUGOVA: “Pa UÇK-në nuk e nënshkruajmë Marrëveshjen”
THAÇIN e “mashtrojmë”, Edita TAHIRI përlotet
SURROI menaxhon mirë
Nënshkruhet “betimi”
Ora 07:00. Tak, tak, tak, dikush trokiti në derën time. Ishte Bukurie GJONBALAJ, e cila tha se Kryetari RUGOVA ka takim me Ministrin e Jashtëm të Shqipërisë, Paskal MILO, në oborrin e Kështjellës, në orën 8:00. E njoftova Kryetarin RUGOVA, por ai refuzoi të shkonte në këtë takim. Shkuan të tjerët. Pas mëngjesit me Kryetarin shkuam në sallën e takimeve. Asgjë e re. Nga takimi me Ministrin MILO kthehen THAÇI, QOSJA, SYLA dhe SURROI”.
Nga libri: “Kështjella e (mos) Marrëveshjes” e Adnan MEROVCIT i cili do të dal nga shtypi së shpejti”, ka shkruar Merovci. /Telegrafi/