Anëtari i Ekipit shtetëror në dialogun me Serbinë, Visar Ymeri, nuk e e ka përjashtuar mundësinë që presidenti Hashim Thaçi të ketë dokumente të tjera të cilat nuk ua ka dhënë bashkë me dokumentet që ia dorëzoi ekipit negociator të hënën.
“Nuk e përjashtoj, nuk kam as gjysmë informate se ka diçka të tillë, por duke e ditur apo njohur zhvillimin e politikës në Kosovë, kam mësuar që askush nga krerët e Kosovës nuk ketë treguar një transparencë të plotë “, ka thënë ai në Rubikon të KTV-së.
Ymeri bëri të ditur se deri në fund të muajit ekipi do ta ketë të gatshëm platformën për bisedimet në Bruksel dhe me fillimin e punës së Kuvendit të Kosovës, me 31 janar, do ta kenë edhe mundësinë e shpalosjes së saj.
Ai ka thënë se ndërkombëtarët kanë kërkuar që marrëveshja të arrihet shpejtë, por “nuk kanë thënë që ajo vlen para cilësisë”.
“Jo çdo marrëveshje do të jetë e pranueshme, për delegacionin shtetëror, e sidomos për përfaqësuesit e PSD-së në delegacionin, jo çdo marrëveshje do të jetë e pranueshme”, shtoi tutje ai.