Në Mitrovicën veriore, për të shtunën e ardhshme, më 2 shkurt, është paralajmëruar të mbahet protesta me moton “Një nga 5 milionë” e cila, sipas organizatorëve, ka për qëllim të tregojë që banorët e këtij qyteti dhe ata të mbetur në pjesë të tjera të Kosovës, të solidarizohen me njerëzit dhe kërkesat e pjesës tjetër të Serbisë të cilët janë duke protestuar tashmë për javë të tëra.
Protesta do të fillojë nga statuja e Car Llazarit dhe do të përfundojë te vendi ku ishte qëlluar për vdekje Oliver Ivanoviq, raporton FoNet, transmeton Koha.net. Po ashtu, qytetarët do të ndezin qirinj.
Kreu i Iniciativës Qytetare “Serbia, Demokracia, Drejtësia – Oliver Ivanoviq”, Marko Jakshiq, në profilet e tij në Twitter dhe Facebook ka njoftuar se protesta do të mbahet patjetër, madje edhe me dy apo tre persona.
“Ky qytet dikur hidhte drita shumë larg. Ky qytet mund të bënte më mirë. Këta njerëz ndoshta kanë merituar më mirë, ne këtë mund ta arrijmë së bashku”, ka shkruar Jakshiq.