Deputetja e Lëvizjes Vetëvendosje, Fitore Pacolli, ka bërë një koment pas ndarjes së 15 mijë eurove nga Qeveria e Kosovës për familjen Daci pas humbjes së të birit Arian Daci.
Ajo ka thënë se shteti I së drejtës vepron njëjtë për të gjithë qytetarët më ç’rast ka thënë se familja e ish zëvendësministrit duhet t’i refuzojë këto mjete.
“Shumë punëtorë për të siguruar bukën për familjet e tyre kanë humbur jetën në vendet e tyre të punës ku punonin pa asnjë masë sigurie. Shumë prej tyre kanë lënë prapa fëmijë pa përkujdesje e në kushte të rënda sociale. Shteti nuk ndau asgjë për ta”.
“Shumë familje detyrohen të kërkojnë nga të afërmit e qytetarët që sado që munden t’i ndihmojnë për të paguar shërimin e fëmijëve të tyre. Shumë kërkesa bëhen në sheshe të qyteteve, radio, rrjete sociale e televizione. Shteti nuk është askund. Shteti nuk i ndihmon këto familje”, ka shkruar ajo në Facebook, transmeton Klan Kosova.
“Sot shteti ndau 15.000 euro për familjen Daci. Vdekja e Arianit është humbje e madhe për familjen Daci por paratë nuk e lehtësojnë dhimbjen e tyre dhe nuk ka nevojë për to. Prandaj familja Daci duhet t’i refuzoj paratë”.
Ajo ka shtuar se Shteti i drejtë vepron drejtë për të gjithë qytetarët pa dallim.
“Shteti social garanton barazi e mirëqenie për të gjithë. Kosova është shtet, por nuk është shtet i së drejtës e as shtet social”.