Kryetari i komunës së Mitrovicës, Agim Bahtiri, i ka bërë kërkesë urgjente Kryeministrit Ramush Haradinaj, nga i cili ka kërkuar që të ndërhyjë në veri, në mënyrë që t’iu mundësohet qytetarëve të Mitrovicës të furnizohet me rrymë pas djegies së trafostacionit në “Trepçë”
I pari i Mitrovicës ka bërë të ditur se serbët e veriut po pengojnë kyçjen e rrymës për Mitrovicën në nënstacionin e Vallaqit.
Ja postimi i plotë i Agim Bahtirit:
Kërkesë urgjente kryeministrit Ramush Haradinaj: Të ndërhyjë Njësia Speciale në Vallaq
Qytetarët e Mitrovicës tash e katër ditë po përballen me mungesë të madhe të energjisë elektrike, problem i cili ka ardhur pas djegies së trafostacionit në ‘Trepçë’. Që situata të jetë edhe më e rëndë, po ndikon moti i acartë i cili po ua vështirëson jetën qytetarëve.
Ekipet përgjegjëse për rregullimin e avarisë e kanë kryer punën e vet, duke përgatitur terrenin për kyçje në nënstacionin e energjisë elektrike në Vallaq, por që kyçja po pengohet nga serbët e instrumentalizuar prej strukturave famëkeqe në veri.
Z. Kryeministër, shteti i Kosovës nuk mund të rrijë duarkryq përballë kësaj situate, por ju duhet të ndërmerrni të gjitha veprimet e nevojshme ligjore dhe operative për ta mundësuar kyçjen e rrymës në Vallaq, ku nëse është e nevojshme duhet të intervenohet edhe me anë të Njësisë Speciale të Policisë së Kosovës.
Qytetarët e Mitrovicës në këto ditë të ftohta janari nuk mund ta durojnë situatën me mungesë të rrymës, prandaj shteti duhet të ndërhyjë sa nuk është bërë vonë.