Kryetari i Lidhjes Demokratike të Kosovës, Isa Mustafa, sot përmes një shkrimi në Facebook ka bërë thirrje për unitet në arritjen e marrëveshjes finale Kosovë-Serbi. Ai tha se pa trashëgiminë e rezistencës së Ibrahim Rugovës dhe atë të dalë nga UÇK nuk ka marrëveshje finale me Serbinë. Mustafa ka bërë thirrje që të punohet bashkërisht për të ndërtuar atë për të cilën është punuar deri më tani.
E këtë mesazh të Mustafës e ka pritur mirë edhe Partia Demokratike e Kosovës.
Nënkryetari i saj, Rexhep Hoti ka thënë se e ka lexuar me vëmendje qëndrimin e Mustafës dhe se sipas tij, ishte një pikëpamje e shkurtër e përmbledhur e ngjeshur dhe e cila i shkon një burrështetasi të vërtetë, pavarësisht në qoftë se ai ndodhet në opozitë apo në pushtet.
Hoti për Indeksonline ka thënë se pajtohet me atë që e ka thënë kreu i LDK-së përkitazi me çështjen e dialogut.
“Ishte një pikëpamje e shkurtër e përmbledhur e ngjeshur dhe e cila i shkon një burrështetasi të vërtetë, pavarësisht në qoftë se ai ndodhet në opozitë apo në pushtet. Pajtohem me atë që ka thënë Mustafa” ka thënë Hoti.
Ai ka thënë se se nuk mund të përmbyllet dialogu pa LDK veçmas. Sipas tij, LDK është parti e cila në vetvete ngërthen shumë pasuri, duke filluar nga nisja e saj si Lëvizje.