Ndonëse u befasua të martën në Yereven nga Armenia, duke pësuar me rezultatin e lartë, 4:0, përfaqësuesja e Maqedonisë në futboll është në rrugë për të fituar një prej grupeve të Ligës D të Ligës së Kombeve të UEFA-s, shkruan sot Koha Ditore.
Kështu Maqedonia është një prej rivalëve potencialë të Kosovës në plejofin e Ligës D, ku garohet për një vend që dërgon në “Euro 2020”. Duhet që Kosova e Maqedonia të fitojnë grupet e tyre e që po ashtu të mos shkojnë në Evropian përmes kualifikimeve të rregullta, për t’u hapur rruga drejt një përballjeje të shteteve fqinjë në plejofin e Ligës D.
Aktualisht Maqedonia është më afër se Kosova që të fitojë grupin e saj, nëse për bazë merret gjendja në tabelë. Në grupin e katërt, Maqedonia prinë me nëntë pikë nga katër ndeshje, derisa Gjibraltari e Armenia i kanë nga gjashtë pikë.
Kosova prinë në grupin e tretë me tetë pikë, ndërsa ka vetëm dy pikë dallim me të dytin. Azerbajxhani i ka gjashtë pikë, Ishujt Faroe katër dhe Malta dy.(Më gjerësisht mund të lexoni sot në Koha Ditore).