Kosova ka kuptimin e saj vetëm kur ruhet tërësia territoriale dhe kur nuk lëshohemi në aventura të copëtimit të territorit të saj.
Kështu u tha sot në Mitrovicë, gjatë një tryeze të përfaqësuesve nga kryesia qendrore dhe nga Grupi Parlamentar i LDK-së me qytetarët e Mitrovicës, ku u diskutua rreth aktualitetit politik.
Kryetari i LDK-së në Mitrovicë, Safet Kamberi, ka shprehur shqetësimin e qytetarëve të Mitrovicës rreth deklaratave të fundit, siç i quajti ai, të pamatura të presidentit të Kosovës Hashim Thaçi.
Ndërsa shefi i Grupit Parlamentar të LDK-së në Kuvendin e Kosovës, Avdullah Hoti, tha se askund më shumë se sa në Mitrovicë nuk është ndier mungesa e konsolidimit të shtetit të Kosovës.
Deputetja Vjosa Osmani, potencoi se gjithmonë vendimet politike për Mitrovicën janë marr larg saj, duke mos dëgjuar zërin e qytetarëve të saj dhe duke injoruar interesat e tyre. Ajo shtoi se ka ardhur koha të flitet pak edhe për dimensionin njerëzor të planeve djallëzore e luftënxitëse që sot po i promovojnë disa.
Ndërsa, deputeti Driton Selmanaj, ka bërë të ditur se protagonistët e dialogut kanë hyrë në politikë vetëm sa për ta ndarë Kosovën.
Në anën tjetër, edhe qytetarët pjesëmarrës të kësaj tryeze kanë shprehur mendimin e tyre sa i përket zhvillimeve të fundit politike në vend./klankosova.tv/