Policia e Kosovës ka ndaluar sot në Pikën Kufitare në Merdar, shtetasin francez Arno Gujon.
Sipas RTS, Gujon erdhi në Kosovë për të marrë pjesë në një hapje në fshatin Prekovc të Novobërdës.
Përveç Gujon, Policia e Kosovës ka ndaluar edhe dy aktivistë tjerë të organizatës humanitare “Serbët për serbët”.
Kallxo.com ka kontaktuar me Drejtorinë e Përgjithshme të Policisë së Kosovës të cilët në përgjigjen e tyre thonë se i njëjti nuk ka pasur leje për të hyrë në Kosovë.
“Mund të konfirmojmë se me vendim të institucioneve kompetente të Kosovës, është ndaluar personi në fjalë dhe pas përfundimit të procedurave të parapara ligjore të njëjtit i është refuzuar hyrja në Kosovë”, thuhet në përgjigjen e policisë.
Në llogarinë e tij në Twitter, Gujon prezantohet si themelues i organizatës “Solidariteti për Kosovën dhe autor i librit “Të gjitha rrugët çojnë në Serbi”.
Ndalimi i tij është dënuar edhe nga shefi i Zyrës për Kosovën në qeverinë e Serbisë, Marko Gjuriq.