Ministri i Arsimit, Shkencës dhe Teknologjisë, Shyqiri Bytyqi, ka paralajmëruar fillimin e një fushate nëpër shkollat e Kosovës, ku do të sensibilizohen nxënësit lidhur me ruajtjen e ambientit.
Këto janë bërë të ditura gjatë një takimi mes ministrit Bytyqi dhe ambasadores së Finlandës në Kosovë, Pia Stjernvall.
Më poshtë statusi i plotë:
Sot, kam pritur në takim Ambasadoren e Finlandës në Kosovë, znj. Pia Stjernvall me të cilën bisedova për mundësitë e thellimit të bashkëpunimit në sektorin e arsimit.
Falënderova Ambasadoren Stjernvall për mbështetjen që Finlanda i ka bërë zhvillimit të arsimit në Kosovë, ku theksova se kontributi i Finlandës si vendi me arsimin më të përparuar në botë është i veçantë në aspektin e mbështetjes profesionale në zhvillimin e reformave të arsimit dhe hartimin e kurrikulës së re të Kosovës.
Me Ambasadoren Stjernvall bashkëbiseduam edhe për mundësinë e fillimit të një fushate në disa shkolla të Kosovës ku do të bashkëbisedohet me nxënës të klasave I dhe IX lidhur me rëndësinë e ruajtjes së ambientit, ku dhe do të ndaheshin pako materialesh nga praktikat finlandeze për këtë qëllim.
Rreth kësaj, e informova Ambasadoren, se MAShT ka angazhuar të gjitha institucionet arsimore në nivel vendi që ti bashkëngjiten fushatës për ruajtjen e ambientit, madje kam kërkuar nga mësimdhënësit që të flasin sa më shumë më nxënësit për këtë temë.