Banesa e reja të ndërtuara për rastet sociale në fshatin Stantërg të Mitrovicë nga tash e tutje do të kenë banorët e parë të tyre, e që janë familjet që më parë ishin në gjendje të rëndë sociale.
Dorëzimin e çelësave familjareve që do të jenë edhe banorët e këtyre ndërtesave e ka bërë kryetari i Komunës së Mitrovicës, Agim Bahtiri, i cili e ka përshkruar mjaft të veçantë ditën e sotme kur edhe ka ndarë çelësat për këto familje në nevojë dhe me gjendje mjaft të rëndë sociale.
Ai ka falënderuar Ministrinë e Punës dhe Mirëqenies Sociale e cila ka siguruar mjetet për ndërtimin e këtyre ndërtesave, ndërsa ka informuar që toka është siguruar nga vet Komuna e Mitrovicës.
Tutje ai ka thënë se komuna do të kujdeset që edhe hapësira rreth këtyre ndërtesave të rregullohet.