Për çdo muaj, listës së veteranëve u janë shtuar së paku 100 persona. Tani benefite si veteranë marrin rreth 37 mijë e 771 persona. Prej vitit 2015, kur edhe filluan të ndaheshin këto pensione, nga buxheti i shtetit janë shpenzuar afër 120 milionë euro, shkruan Gazeta Express
Disa e dhanë jetën duke luftuar, e të tjerë as që e prekën pushkën me dorë. Por, pas përfundimit të luftës të gjithë u barazuan dhe u thirrën në emër të Ushtrisë Çlirimtare të Kosovës (UÇK). Tani, pensione në emër të veteranit marrin edhe ata që ikën jashtë vendit gjatë kohës së luftës e nuk luftuan kurrë, shkruan Gazeta Express.
Për çdo muaj, listat e veteranëve u frynë për së paku 100 persona. Ka edhe raste kur numri i tyre u rrit për mbi 300 veteranë.
Vetëm në muajin prill, listës së përfituesve së pensioneve të veteranëve u janë shtuar më shumë se 350 persona. Prej 37 mijë e 44 personave sa merrnin pensione në muajin mars të këtij viti, në prill në listën e përfituesve figurojnë 37 mijë e 395 persona.
Listat e veteranëve u frynë për mijëra persona me kalimin e viteve. Në vitin 2015, kur edhe filluan të ndaheshin këto pensione, përfitues kanë qenë 13 mijë e 442 veteranë. Deri në gusht të vitit 2018 kjo shifër ka shkuar në 37 mijë e 771 veteranë.
Të gjithë këta veteranë e rënduan buxhetin e shtetit për miliona euro. Për tri vite vetëm për pensione të veteranëve janë shpenzuar afër 120 milionë euro nga kuleta e shtetit.
“Për pensione të veteranëve në vitin 2015 janë ndarë 5 milionë e 418 mijë e 113 euro, në 2016 janë ndarë 47 milionë e 864 mijë e 133 euro dhe në 2017-ën, shuma e parave që janë ndarë për veteranë është 65 milionë e 854 mijë e 654 euro”, thuhet në statistikat e Ministrisë së Punës dhe Mirëqenies Sociale që ka siguruar Gazeta Express.
Por, jo vetëm për veteranë janë ndarë gjithë këto para. Përfitues të pensioneve janë edhe familjet e veteranëve. Të gjithë këta, bankave u drejtohen ditën e 24-të të çdo muaji. Në po këtë ditë, atyre u dalin pensionet, ani pse ka përjashtime.
“Pensionet për të gjitha kategoritë dalin më datë 24 të çdo muaji , përveç në rast se data 24 është vikend apo është festë pensionet dalin para datës 24”, ka thënë Kryesuesja e Divizionit të Pagesave, Hajrie Pajaziti për Express.
Megjithëse edhe zyrtarë shtetërorë e prokurorë kanë deklaruar disa herë se listat e veteranëve janë fryrë, askush deri më tani nuk pati guximin që t’i nxjerrë para drejtësisë përgjegjësit.
Madje, edhe Prokurori i Prokurorisë Speciale të Kosovës, Elez Blakaj, i cili ishte duke i hetuar këto lista, dha dorëheqje të mërkurën. Në media u raportua se një nga arsyet pse Prokurori Blakaj dha dorëheqje ishin kërcënimet që kishte marrë për këtë lëndë, ndonëse prokurori në letrën lamtumirëse nuk përmend diçka të tillë.
Se listat e veteranëve janë fryrë është në dijeni edhe Kryeprokurori i Shtetit, Aleksandër Lumezi.
Sipas Lumezit, janë 19 mijë persona që jashtëligjshëm kanë fituar statusin e veteranit dhe marrin benefite nga shteti.
Ndryshe, për rritjen e numrit të veteranëve kishin reaguar edhe nga Fondi Monetar Ndërkombëtar.
Shefi i Fondit Monetar Ndërkombëtar, Ruud Vermeulen kishte thënë se pa një riklasifikim, sipas Ligjit të amendamentuar për Veteranët e Luftës dhe pa verifikimin e përfituesve shpenzimet do të rriten dhe do t’i tejkalojnë alokimet buxhetore prej 20 milionë eurosh.
“Në të vërtetë numri i përfituesve të skemës së pensioneve të veteranëve të luftës vazhdon të rritet përtej çdo pritjeje. Tani flasim për 37.000 përfitues kundrejt vlerësimeve fillestare prej më pak se një e treta e asaj në vitin 2015. Kjo është pothuajse 9.000 më shumë se vetëm një vit më parë.
Pa një riklasifikim, sipas Ligjit të amandamentuar për Veteranët e Luftës, si dhe pa verifikimin e përfituesve, shpenzimet do të rriten dhe do t’i tejkalojnë alokimet buxhetore prej së paku 20 milionë eurosh, duke sjellë shpenzime në 1,2 për qind të GDP-së ose ½ për qind mbi tavanin 0,7 për qind të GDP-së, që do të hyjë në fuqi sapo riklasifikimi të përfundojë”, kishte thënë Vermeulen. /Gazeta Express/