Pas shtrirjes së shërbimit të mbledhjes dhe menaxhimit të mbeturinave në gjithë territorin e Komunës së Vushtrrisë, sot edhe zyrtarisht ka filluar shpërndarja e faturave të mbeturinave për ekonomitë familjare në gjithë Vushtrrinë.
Menaxhimi i këtij procesi, në bazë të reformës në sistemin e menaxhimit të mbeturinave, tani ka kaluar në Komunën e Vushtrrisë, derisa shërbimin do ta kryejnë Njësia për menaxhimin e mbeturinave Uniteti në Vushtrri.
Sot përmes një ceremonie zyrtare kryetari i Komunës Xhafer Tahiri, ka bërë dorëzimin e të gjitha faturave Njësisë së ‘Unitetit’ që do ti shpërndajnë te të gjitha ekonomitë familjare të Vushtrrisë. Përveç se ka falënderuar të gjithë ata që kanë kontribuar në realizimin e këtij projekti shumë të rëndësishëm, si Drejtorinë e shërbimeve publike, GIZ-in, GAC-in dhe gjithë të tjerët, kryetari Tahiri u ka bërë thirrje që ti përgjigjen sa më mirë pagesave të faturave për shërbimin e mbledhjes së mbeturinave, pasi që edhe mbledhja e tyre shtëpi më shtëpi është duke shkuar shumë mirë.
Edhe pse mbledhja e mbeturinave nëpër shumë fshatra ka filluar që nga maj i këtij viti në fazë testuese, në fakt faturim ka filluar që nga 1 korriku i këtij viti.
Në gjithë territorin e Komunës së Vushtrrisë janë mbi 17 mijë ekonomi familjare, derisa ngarkesa për mbledhjen e mbeturinave për një muaj është 4.4 Euro për një familje./K.Vushtrrise