Thuajse nëpër të gjitha prokuroritë themelore të Kosovës janë duke u hetuar raste që ndërlidhen me fryrjen e listave të veteranëve. Vetëm në Prokurorinë Themelore në Pejë deri tash është ngritur një aktakuzë dhe janë duke u hetuar katër raste të fryrjes së listave të veteranëve.
Lëndët e mashtrimit me listat e veteranëve të Ushtrisë Çlirimtare të Kosovës (UÇK) u janë shpërndarë disa prokurorive themelore në të gjithë territorin e Kosovës.
Disa prej prokurorive tashmë janë duke i hetuar këto raste, ndërsa disa të tjera janë në pritje të delegimit të rasteve të tilla nga Prokuroria Speciale e Kosovës, shkruan Zëri.
Prokuroria Themelore në Prishtinë ende është në pritje të marrjes së lëndëve që kanë të bëjnë me fryrjen e listave të veteranëve.
Kjo prokurori do t’i hetojë rastet e mashtrimeve që kanë të bëjnë me rajonin e Fushë Kosovës, të Lipjanit dhe të disa qytezave të tjera që janë pjesë e rajonit të Prishtinës.
Nga ana tjetër, para pak ditësh, Prokurori Special Elez Blakaj, që po hetonte “veteranët e rrejshëm”, ka dhënë dorëheqje. Më pas, i njëjti ka shpërthyer në akuza përmes Facebook-ut, ndaj kryeprokurorit të Shtetit, Aleksandër Lumezi.
Pas dorëheqjes se Blakajt, lënda e veteranëve të rrejshëm të cilën Blakaj nuk e çoi deri në fund, iu dha një prokurori tjetër special, shkruan Gazeta Express.
Elez Blakaj pretendon se ka ngritur një aktakuzë për veteranët e rrejshëm, por që ajo kurrë nuk u dërgua nga ai në gjykatë, por e njëjta rrodhi vetëm në media.