Gjatë qëndrimit të tij në Vushtrri, ministri i Zhvillimit ekonomik, Valdrin Lluka, sot është takuar takuar me kryetarin e Komunës, Xhafer Tahiri, me të cilin diskutuan për projekte të rëndësishme që përmirësojnë jetën e qytetarëve.
Ministri Lluka premtoi qasje të të gjitha fshatrave të komunës së Vushtrrisë në rrjetin e ujësjellësit, si dhe premtoi angazhim për përfshirjen e Vushtrrisë në rrjetin e pastrimit të ujërave të zeza. “Ne u pajtuam që integrimi i fshatrave të Vushtrrisë të ketë prioritet. MZhE së bashku me qeverinë zvicerane e ka një projekt rreth 18 milionë euro ku ka për qëllim integrimin e fshatrave në rrjetin e ujësjellësit rajonal. Vushtrria do të jetë pjesë e këtij projekti për t’i lidhur të gjitha ato familje që nuk kanë kyçje në ujë të pijshëm”.
Ai foli për mundësinë e përfshirjes së Vushtrrisë në trajtimin e ujërave të zeza. Qëllimi jonë është që trajtimi i ujërave të zeza të jetë në secilin qytet kryesor të Kosovës, duke përfshirë pra Prishtinën, Mitrovicën dhe Vushtrrinë, tha ministri Lluka.
Nga ana tjetër kryetari i Vushtrrisë, Xhafer Tahiri, falënderoi ministrin e Lluka për përkrahjen që tregoi për ta mbështetur Vushtrrinë.
“Me ministrin biseduam për qasjen individuale të familjeve në rrjetin e ujësjellësit. Ministri e përkrahu këtë projekt me kënaqësi dhe shumë shpejt do të përfshihet qoftë përmes fondeve të donatorëve, qoftë në kuadër të ministrisë. Ky është një lajm i mirë për qytetarët e Vushtrrisë”. “Po ashtu biseduam për projektet strategjike të qytetit të Vushtrrisë siç është projekti i ujërave të zeza, projekti i ngrohtores së qytetit përmes projektit të koogjenerimit dhe projektet e tjera strategjike, zonat ekonomike e kështu me radhë”, ka deklaruar Tahiri./Veriu.info/.