Deputeti nga Vojvodina, Nenad Çanak. sot në Twitter ka shkruar se mbrëmë në Bella Cerkë, është zhdukur gazetari Stefan Cvetkoviq.
Çanak, siç njofton b92, ka sqaruar se është gjetur automobili i tij me motorin e ndezur, me dyer të hapura dhe ora e dorës pa rrip afër veturës. “Të gjithë telefonat i ka pasur të shkyçur”, ka shkruar Çanaku.
Herën e fundit është përmendur në publik kur më 19 maj të këtij viti i ka treguar medieve se ka qenë i ndalur për gjashtë orë në kufi te Jarinja dhe ka pretenduar se pas kësaj ka marrë një dokument nga Policia e Kosovës me të cilin konfirmohet se sipas urdhrit të prokurorit special i cili po e udhëheqë hetimin mbi vrasjen e politikanit Oliver Ivanoviq, është ndalur në afërsi të kufirit për shkak të hetimit.
Përndryshe në shkurt ai e ka mbajtur një konferencë në Beograd, në të cilën i ka treguar fotografitë e personave të cilët pretendohet se e kanë likuiduar Ivanoviqin, dhe për këtë, siç ka pretenduar ai, kanë marrë 40.000 euro.
Zhdukjen e gazetarit e ka konfirmuar edhe Policia e Serbisë në Bella Cerkë e cila ka shtuar se po bëhen hetime për gjetjen e tij./Insajderi/.