Grupe nxënësish të komuniteteve të ndryshme në Mitrovicë, sot për së afërmi kanë vizituar objektet policore në kuadër të Drejtorisë Rajonale në Mitrovicë.
Kjo vizitë u realizua në frymën e bashkëpunimit të ndërsjellë ndërinstitucional dhe qasjes aktive ndërmjet Policisë dhe organizatës joqeveritare, ‘7 arte” në kuadër të projektit multietnik të titulluar ‘E ardhmja e sigurt për të rinj’, me ç’rast grupin e nxënësve në një takim i priti edhe zëvendësdrejtori rajonal i Policisë, major Nysret Mehmeti, i cili shprehi gatishmërinë dhe përkushtimin e vazhdueshëm në qasje të përbashkët në identifikimin dhe zgjidhjen e problemeve në mbështetje të komunitetit dhe mekanizma tjerë ndërinstitucionalë.
Zëvendësdrejtori rajonal theksoi se aktivitetet e përbashkëta multietnike të të rinjve janë vlera universale, ku njëherit u zotua se Policia në vazhdimësi do të bashkëpunojë me OJQ dhe të rinj në fushën e edukimit, sensibilizimit, të dukurive negative, përfshirë sjelljet asociale, rreziku dhe pasojat nga substancat narkotike, si dhe krimet kibernetike.
Interesimi i nxënësve për të vizituar Policinë njëkohësisht përmbush edhe objektivat e tyre që buronin nga perspektiva e ligjëratave të mëhershme të zhvilluara nga Policia së bashku me OJQ ‘7 arte’.
Gjatë vizitës së nxënësve në Polici ata janë njoftuar për punën policore, hapësirat e punës në objektin policor, qendrën e komunikimit, njëkohësisht zyrtarët policorë iu kanë ofruar informacione për punën rutinore policore, si dhe njohuri elementare për thirrjet emergjente, dërgimin e informacionit me kohë në fushën e parandalimit të hershëm etj. Gjithashtu nxënësve u është shpjeguar edhe për të drejtat dhe përgjegjësitë e të miturve.
Nxënësit gjatë vizitës pasqyruan njohuri të kënaqshme për punën, rolin e Policisë në fushën e sigurisë, si dhe rëndësinë e qasjes së përbashkët në parandalimin e dukurive negative./DrenicaPress/.