Komisioni Kombëtar për Siguri të Aviacionit Civil vlerësoi sot se gjendja e sigurisë në Aeroportin Ndërkombëtar të Prishtinës “Adem Jashari” është brenda standardeve të kërkuara ndërkombëtare.
Sot në Ministrinë e Punëve të Brendshme u mbajt takimi i dytë i Komisionit Kombëtar për Siguri të Aviacionit Civil, një komision i themeluar në gusht të vitit 2011.
Përmes një njoftimi për media bëehet e ditur se takimi ishte ftuar nga ministrit i Brendshëm, Bejtush Gashi, në cilësinë e kryesuesit të Komisionit Kombëtar për Siguri të Aviacionit Civil, për të diskutuar në lidhje me gjendjen e sigurisë së aviacionit civil në Republikën e Kosovës, theksohet në njoftimin për media.
Ministri Gashi i njoftoi anëtarët e Komisionit Kombëtar për Siguri të Aviacionit Civil, se planifikon të mbajë takime të rregullta të këtij mekanizmi, me qëllim të ruajtjes së nivelit të kënaqshëm të sigurisë në aviacionin civil në Kosovë.
Gjithashtu, në këtë takim u diskutua edhe për raportin dhe rekomandimet e Komisionit Evropian, për vizitën vlerësuese në Aeroportin Ndërkombëtar të Prishtinës “Adem Jashari”, për gjendjen e sigurisë.
Të pranishmit vlerësuan se gjendja e sigurisë në Aeroportin Ndërkombëtar të Prishtinës “Adem Jashari” është brenda standardeve ndërkombëtare të kërkuara./Insajder/.