Fushata “Shijo djathin e vërtetë, 100% nga qumështi” shënon sot ditën ndërkombëtare të qumështit dhe ka për qëllim informimin e qytetarëve të Kosovës mbi rëndësinë dhe dobitë e konsumimit të djathit vendor 100% nga qumështi
Në një njoftim, bëhet e ditur se dita ndërkombëtare e qumështit në Kosovë fillon me ceremoninë kryesore më 1 Qershor, e cila do të organizohet me fillim prej orës 11:00 në sheshin “Skënderbeu” në Prishtinë.
Të pranishëm në këtë ngjarje do të jenë shumë mysafir edhe përfaqësues nga USAID, Agjencia e Ushqimit dhe Veterinarisë në Kosovë, Shoqata e Prodhueseve të Qumështit (SHPQK) dhe Shoqata e Qumështoreve të Kosovës (SHQK).
Për të shënuar ditën ndërkombëtare të qumështit do të ketë aktivitete të ndryshme ku do të marrin pjesë të gjitha qumështoret e Kosovës me produktet e tyre dhe në të njëjtën kohë do t’i shpërndajnë produktet e qumështit fëmijëve për të festuar edhe ditën e fëmijëve.
Aktivitetet do të përcillen edhe me maskotën e fushatës përmes së cilës fëmijët mund të realizojnë foto te ndryshme. Fushata për promovimin e djathit 100% nga qumështi do të vazhdojë me aktivitete të tjera për fëmijë edhe pas datës 1 qershor, duke përfshirë vizitat tek prodhuesit vendor të djathit 100% nga qumështi si dhe vizitat nëpër shkolla në shtatë rajonet e Kosovës me qëllim të informimit të fëmijëve për dobitë e djathit 100% nga qumështi.