Me qëllim të adresimit të shqetësimeve nga KUR “Mitrovica” njësia në Vushtrri, lidhur me keqpërdorimin të ujit të pijes, Komuna e Vushtrrisë sot ka themeluar Task Forcë të veçantë por edhe ka aprovuar masat si në vijim për të siguruar ujë të pijes për qytetin gjatë sezonit të verës.
Masat konkrete që janë aprovuar sot në takimin e drejtuesve të Komunës në krye me kryetarin Xhafer Tahiri, me Drejtorin e KUR “Mitrovica” njësia në Vushtrri, Policinë e Kosovës dhe Inspektoratin komunal janë:
- Fabrika e ujit në Vushtrri do të shtojë prodhimin e ujit gjatë sezonit ku orari i punës do të zgjatet në 18 orë në ditë nga 12 sa është tani;
- Ndalohet përdorimi i ujit të pijes për bizneset si autolarje; pastaj ndalohet përdorimi i ujit të pijes për ujitje të kopshteve apo pastrim të oborreve e trotuarve;
- Të gjitha bizneset shërbyese në Vushtrri duhet të ndalojnë përdorimin e ujit të pusit, kjo me qëllim të ruajtjes së shëndetit publik të qytetarëve;
- Me qëllim të rritjes së sigurisë sanitare, është marr vendim për inspektim të bizneseve hoteliere dhe të përgatitjes së ushqimit, nëse janë të lidhura apo jo në rrjetin e ujësjellësit.
- Angazhimi i policëve të dedikuar për punë në komunitet për të marrë masa ndaj keqpërdorimit të uji kudo që e hasin policët apo inspektorët komunal.
Task Forcën komunale do të udhëheqë Nënkryetari i Komunës së Vushtrrisë, z. Besim Muzaqi.