Ministria e Mjedisit dhe Planifikimit Hapësinor paralajmëron ndëshkime për të gjithë ata që ndezin goma në prag të Ditës Ndërkombëtare të Punëtorëve – 1 Maj, transmeton Indeksonline.
Duke përkujtuar se Ligji për mbrojtjen e ajrit ndalon rreptësishtë djegien e gomave dhe parashihen gjoba 100 euro, MMPH thekson se ndezja e zjarreve dhe në veçanti gomave janë veprime që do të ndëshkohen.
“Ndezja e gomave në mjedis të hapur liron dioksinën dhe materie tjera të rrezikshme që shkaktojnë probleme serioze shëndetësore, si dëmtimin e organeve të frymëmarrjes, kancerin e mushkërive, dëmton lëkurën duke shkaktuar edhe shumë probleme të tjera shëndetësore”, thuhet në komunikatë.
Për më tepër, MMPH paralajmëron se ndezja e zjarreve të tilla, bartë me vete pasoja të mëdha për mjedisin dhe ndezja e zjarreve pa kontroll ka vënë në rrezik jetën dhe shëndetin e njeriut, pasurinë private dhe shoqërore, si dhe ka degraduar mjedisin tonë edhe ashtu në gjendje jo të mirë./Indeksonline/.