Policia konfiskon 82 kilogramë drogë në tavanin e një shtëpie në veri të Mitrovicës
Policia ka bërë të ditur se ka konfiskuar rreth 82 kilogramë drogë në shtëpinë e një serbi fshatin Suhodoll në veri të Mitrovicës.
“Dje me datë 28.02.2018, gjatë punëve intenzive policore operacionale dhe hetimore Policia e Kosovës ka arritur të marr informata relevante se në fshatin Suhodoll, në një shtëpi të një personi mashkull kosovar/serb gjendet sasi e substancës së dyshuar si drogë”, thuhet në njoftimin e policisë.
“Policia me njësitet relevante, asistuar edhe nga stacioni policor Mitrovicë veri, sipas procedurave ka ndërmarrë veprimet e nevojshme dhe pas realizimit të kontrollit, në tavanin e shtëpisë së lartcekur janë gjetur dhe konfiskuar 27 pako që dyshohet se janë substancë e dyshuar narkotike e llojit marihuanë, të destinuara për shitje, dhe pesha totale ka rezultuar; 81 kg. e 825 g. (afër 82 kg)”, vazhdon njoftimi.
Policia thotë se lidhur me rastin është njoftuar edhe prokurori kompetent për veprime të tjera sipas procedurave ligjore.
“Policia e Kosovës mbetet e përkushtuar në angazhimet e saj dhe nuk do të tolerojë asnjë veprim që bie ndesh me ligjet e vendit, e në veçanti do të jetë e pakompromis në luftimin e dukurive negative dhe trafikimit me narkotik”, përfundon njoftimi./Insajderi.com