Komuna e Vushtrrisë dhe Aleanca Kosovare e Biznesit sot kanë lidhur marrëveshje bashkëpunimi, mes këtyre dy institucioneve për mbështetje të bizneseve dhe prodhuesve vendor.
Kryetari i Komunës, Xhafer Tahiri, dhe kryetari i Aleancës Kosovare të Biznesit, Agim Shahini, sot kanë nënshkruar marrëveshje për mbajtjen e Panairit të prodhimeve vendore në Vushtrri, pikërisht në Ditën e Çlirimit të Vushtrrisë me 17 qershor, pastaj ndarjen e bursave për studime të larta në Kolegjin “Universum”, gjetjen e një hapësire të nevojshme për-Zyrë për takime me bizneset e Komunës, por edhe projekte tjera të përbashkëta, transmeton Veriu.info.
Në ceremoninë e nënshkrimit të kësaj marrëveshjeje, kryetari Xhafer Tahiri, tha se komuna është shumë e interesuar për mbështetjen e bizneseve lokale për shkak se janë gjeneratori i vendeve të punës dhe zbutjes së papunësisë. Për këtë vit, Tahiri tha se do të mbështesim bizneset e vogla dhe bizneset e reja me grante direkte, pastaj do të ofrojmë kredi për mbështetjen e bizneseve ku komuna do të mbuloj pjesën e interesit, si dhe do të fillojnë investimet në ndërtimin e Parkut të biznesit.
Nga ana tjetër kryetari i Aleancës Kosovare të Biznesit, Agim Shahini, tha se qëllimi i AKB-së është mbështetja e bizneseve dhe prodhuesve vendor, por edhe bashkëpunimi me institucionet për të njëjtin qëllim. /Veriu.info/